نيلة منيلة بنيلة

عمال اقلب صفحات النت على حاجه كويسه .. اقرا موضوعات وكلام ناس .. واجي بس لسه حاعجب بيه .. الاقيه منشور في عشرين الف منتدى .. عربي طبعا .. يخرب بيتكم .. مفيش فرامل شويه على السرقة .. الموضوع فتش عليه تلاقيه منشور في عشرين منتدى وكل واحد عامل نفسه على راي عادل امام ( زهبج ) وعمال يكتب والناس الغلبانه وراه ترد .. شكرا على الموضوع الرائع .. كتكو نيله مليتوا البلد ..

............................

واحد مبتكر ده بأه وعامل نفسه رقيق وحساس وكاتب وشااعر وبتاع مشاعر .. اسمع .. معايا .. واستغرب , جاب عشر كلمات شاعرية .. وقعد يقلب فيهم ويرتبهم بطريقة زي المكعبات بتاعة الاطفال .. مش مكعبات ماجي .. كتب مثلا الليل .. والبحر .. والهوا .. والسما .. والقرب والبعد والشوق واللوع والحب والحنان والاحساس وكام كلمة على رأي سيد درويش .. على كام ليل وياعين ويالالا للي .. وعمل بيهم موضوع .. وماشاء الله .. الناس وراه أمم سبحان ربك .. ياشاعر يافنان .. والله حساس .. وبعد يومين تلاقيه مرتبهم بطريقة تانية .. حاطط الليل مكان العين والبحر مكا ن السما وبياكل عيش بيهم .. كتك نيله مليتوا النت
...........................

وواحد تقرا له تقول صلاح جاهين .. وعجبي .. لكن الغريب ان اول موضوعه غير نصه وغير آخره .. يعني بيتكلم عن افتتاحيه مالهاش علاقة بنص الموضوع .. وبعدين بيختم بمعنى ثالث .. تقوله اعمل ترابط يقولك هو الفكر بيسرح .. وبيشرد .. وده هذيان .. يادي النيلة .. ايه حكاية الهذيان اللى ماشية في البلد دي .. الناس اتهبلت .. وبتخرف .. ادينا احنا كمان بنهذي .. وبالمنسبة دي بنهذي اليكم اطيب التحيات .. ياكش تولعوا ..

...........................

وانا كمان عمال انفخ في قربة مقطوعة .. ومركز على ثلاث اربع مواضيع ومالي المنتدى بيهم كأن الدنيا مفيش غيرها .. ياعم اطلع من القشرة دي وافقس بأه ورعرع وخليك كتكوت فصيح .. هو انت مسطول ياجدع .. وغارق في الوهم لشوشتك .. ومغرق الناس معاك .... الدنيا فيها حاجات كتيرة ياعم غير الحب والقلب والضرب والقسمة والطرح .. واكتب شويه عن مشاكل الناس .. مالك يا سرحان معندكش مشاكل ولا ايه .. الدنيا مليانه مشاكل شباب وكبار وازواج وانت ماسك لي موضوعين عمال تكتب فيهم ومقطع نفسك .. ايه يامصطفى .. كتك نيله مليت المنتدى وجع قلب

وصلت لأكتر من كده

انا ليا اصدقاء رسامين بقى يتاخد رسمهم
ويغيرو التوقيع اللى عالرسمة لأسم الحج الى بيسرق الرسمات

يلا ربنا يعيننا

أستاذ مصطفي
فعلا هذا موضوع يضايق ولا بد من حل له علي أكثر من مستوي
فلو تكلمنا عن منتدي مثل منتدانا
ماذا نفعل بعد أنخصص باب للموضوعات المفيدة المنقولة
ومع هذا نجد من يترك هذا الباب ويكتب في مكان أخر!!!
علي أن الموضوع من أبداعه
مع أن هذا الأمر غير مفيد للشخص نفسه
فمن ينقل سيظل ينقل ولا يستطيع كتابة شيء
أما من يبدء مع الوقت يستطيع أن يعبر عن نفسه والاخرين
ثم هناك موضوعات معروف أنها منقولة
لكن الحياء
يمنع البعض من قول ذلك
فيتمادي من ينقل ظنا أن الأمر غير مكشوف
وأنا أتسأل
كيف يتحمل الفرد أن يثني عليه الناس في شيء لا يخصه
وعجبي

الرغي الي فات نساني أقول لكم
مبروك القسم الجديد
أرغي ياعم الأمور
لكن أريد أسأل سؤال
هناك مكان للفضفضة
فما الفرق بين الرغي والفضفضة
أذا كانوا الكلمتين في صدره وتعبينه
يرغي ولا يفضفض
ههههه

سؤال وجيه
القسم فضفضة
هو فضفضة قلوب ومشاعر
عن مسائل حسية وعاطفية
واشياء قريبة من منطقة القلب والروح
وطبعا كلنا عارفين وشايفين ايه بيتكتب
في الفضفضة
لكن هنا .. نحكي حكايات عاديه مسائل بتضايفنا
او بتسعدنا او بنشوفها يوميا يعني اشبه باليوميات
او المرئيات .. نيجي نكتبها في اي قالب وبدون اي تصنيف
زي الفضفضة .. لأن الفضفضة هي فضفضة قلوب يعني
مصنفة كده اما هنا مفيش تصنيف .. يعني عام ومش خاص
وبالشكل اللى العضو يشوفه بحريته . ياريت اكون قربت الفكرة

zodiak كتب:: وصلت لأكتر من كده

انا ليا اصدقاء رسامين بقى يتاخد رسمهم
ويغيرو التوقيع اللى عالرسمة لأسم الحج الى بيسرق الرسمات

يلا ربنا يعيننا

بس ما تقولش حاج
قول الحرامي

مليون مبروك اولا
على افتتاح القسم الهايل ده
واه طبعا فيه فرق بين فضفضة القلوب ...والرغى على اى حاجه تكون مضياقك خنقاك
زى كده مثلا
مخنوقة وقرفاااااانة من حاجات كتير اوى:::
اولها مواصلات جمهوريتنا الغاليه تخنق وتزهق وطلع الروح
وتخرج الواحد عن شعوره
واللى ارخم من الزحمة والميكروباصات
الكاروووووو ااااااااه من عربيات الكاروا البلد الوحيده اللى محتفظة بالنوع ده من السيارات على اساس كل من له اربع رجول فهو
سيارة ههههههههههههههههههه
اه ولما سألت عدد من السائقيين ...طبعا التاكسي وليس الكارو قاله اننا ما نقدرش نسوق من غير وجود النوع الاصيل ده من السيارات في شارعنا المصرى
وده ليه؟؟
لانها من التراث المصري الاصيل
وعجبي
اكيد انا مخنوقه من مليون حاجه تانية
بس كفايه دول النهارده
رجعه تانى ان كنت من اهل الارض

والله دى نيله اوى اوى

كله اقتباس اقتباس ولسه في نيلات كتير هاجى ارغى معاكم للصبح واقولكم انا مفقوووووعه من ايه

هى المشكلة مشكلة أقتباس وبس دى القضية اكبر من كده بكتير يا ام بودى :
انتى شيفة يعنى ان الحياة الأ عايشها الأنسان المصري بالتحديد اتعدلت اوى يعنى مش فاضلنا غير الأقتباس
يا أختى المسألة يا رتها تيجى على اد كده وبس
انا بأة مفقوعة من الناس أكتر من اى حد في الدنيا
خلونى اتعلم فنون جديدة في التعاملات كنت بضحك على اى حد يقولى عاملى الناس زى ما بيعاملوكى
كنت اقول ازاى وفين تبقي أنا لما اتحول لسين وصاد
لا لا الناس ليهم المعاملة الكويسة وبس وبجد ساعات تقبلى نوادر طيبة وجميلة وصافية
تحبك فى الله وكتيير بأة توقعى في ابو وشين وأم طهرين دول اللى مجنني
ومش عارفة للدرجة دى الدنيا غالية عند الناس دول ؟؟
ده أحنا ضيوف ورايحين مكان ما راحوا أجدادنا !!
يعنى مش مستهلة الصراع وللؤم والخباثة دى كلها عشان قرش ولله قرشين زيادة ؟
بس تقولى لمين !!
اللى يمشي ورا عقول الناش
ممكن يفقد عقله وظله ونفسه وأسمه وهدومه كمان
ان لازم الأمر
هههههههههههههههههههههه
واكيد مستناكى ورجعلكم تانى