جوزي اتحوز عليه

ده مش موضوع للمرح ولا السخرية .. لكن يمكن طريقة روايته حتكون مرحة شويه .. قضية بتتكرر كتير .. وبتحصل .. ان احدى النساء تأتي وتبكي .. وتشتكي .. جوزي عرف واحد عليه .. أو جوزي طلقني عشان واحده تانيه .. أو جوزي اتجوز عليه .. كلها تؤدي تقريبا نفس الوقع .. مع اختلافات بسيطة ..
انا مش امرأة عشان اقدر احكي وافرق بينهم .. لكن اللى بنشوفه ونسمعه بيوصل لنا منهن ..
تبدأ القصة من النهاية .. كل قصة لها بداية ونهاية ..الا تلك القصة .. فهي تبدأ من النهاية .. والنهاية المحزنة للمرأة وهي هجران زوجها أو طلاقه منها أو زواجه من اخرى ..
وتأبي كثير من النساء اللائي يقعن في تلك القصة ان يروين البدايات ..ولكنهن يحكين حكايتاهن من النهاية ,. والنهاية المؤلمة هي :
1 - استغلال الزوج لحق من حقوقه بشكل متعسف ..
2 - قلة الأصل لدى الزوج .. فبعد ان ولعت زوجته صوابعا العشرة شمع .. ( مع الاعتذار للمشرفة شمعه ) راح اتجوز عليها أو راح عرف ست تانيه أو طلقها .. شفتوا النهاية .. الراجل قليل الأصل .. بعد كل اللى عملته الست معاه .. راح عمل عملته .. والناس تضرب كف على كف .. هو حصل ايه في الدنيا ياناس .. الرجالة اتهبلوا .. حتة بنت صغيرة راحت ضحكت عليه .. أو شوفوا الراجل راح ساب مراته اللى زي القمر ومخلفه له العيال ( وكأن الست مخلفه العيا لزوجها بس مش لنفسها ولا عشان تتعايق وسط اصحابها وتقول انا باخلف .. ولا تمشي وبطنها قدامها وتقول للأرض اتهدي ما عليكي قدي ) هو حصل ايه ياناس .. الراجل بعد ما الست خلفت له العيال ( معلش خليهاتمشيى كده زي ما بيقولوا ) وعملت له المحشي ونضفت السمك اللى اتسمم بيه .. وكنست له البيت ( ال يعني البيت مش بيتها ) وربت له عياله ( ال يعني العيال مش عيالها وعياله هو من ست تانيه ) بعد كل ده قليل الأصل يروح مش عارف يعمل ايه ..
3 - الست المسكينة اللى لا بيها ولا عليها .. وفي امان الله وشايفه فرضها ومصليه وصايمة ومراعية ربها .. راح الزوج المجرم الكافر وتركها ..
4 - كل الرجالة خونه .. وده طبعهم .. ويا مأمنا للرجال .. كملوا انتم .. وقعد الست في وسط اصحابها تقول وتحكي .. كنت باعمل وبعمل بس هما خونه .. تقولي ايه ياختي .. طبع فيهم .. مهما تعملي .. وطبعا كل اصحابها يروحوا البيوت ويبصوا على ازواجهم ويتخيلوا بيعملوا ايه من وراهم .. والست تشيل الهم وتقول مادام كل الرجال كده يبقى جوزي بيعمل زيهم .. هو مش راجل .. اه وياترى امتى حيرميني الرمية السودا دي ..

الحكاية لغاية هنا عاديه ومنطقية وبتتكرر زي ما باقول لكم .. بس عايزين نحكي الحكاية من الأول .. بلاش نحكيها من الآخر ..

اولا حاجه حنقولها عشان ما نتهم بقية الستات بأنهم كلهم وحشين .. رغم انهم بيقولوا علينا كده واننا خونه ولا يأمن عليهم ..
خلينا نقول ان دي مش العاده .. وان فيه رجاله كتير معمرة بيوتها ( بيني وبينكم .. رغم ان ستاتهم عايزين .... ) ما علينا ..
وفيه ستات في منتهى الجمال وزي العسل والست متفانية في خدمة جوزها وهناه جوه وبره ..

عايزين نقول حاجه صغيرة .. بس عشان ما نقطعش هدوم بعض ..
مفيش ظلم بيحصل على انسان الا وليه جزء يستحقه منه .. لأن ربنا مش بيرضى بالظلم .. صح ؟ دي نقطة ..ولو الراجل استغل فعلا حقه بطريقة ظالمة .. يبقى مش حيروح بعيد عن حكمة وقدرة ربنا ..
لكن لو الراجل استغل حقه ده وهو مظلوم .. يبقى نحكي من الأول ..

1 - الخنقة اللى الراجل اتخنقها من مراته .. رايح فين .. وجاي منين .. وبتصرف كام .. ومعاك ايه .. وكأن الراجل اصبح عبدا من عبيدها لدرجة ان فيه ستات بتعامل اولادها باحترام وحرية اكتر ما بتعامل ازواجها ..
2 - النكد ..
يالهوي على النكد .. الست تبقى مرحه وحلوه وزي العسل بره البيت .. واول ما جوزها يدخل البيت تقوم تقلب الوش الخشب .. اه ماهي لازم تعمل له كده .. امال حيخاف منها ازاي .. لازم تبقى هي الراجل .. وتأمر وتنهي وتعلي صوتها .. ماهي لازم تحكمة وتعلمه الأدب احسن يتفرعن ويشوف نفسه .. وتلاقي الست غاوية نكد عل الفاضي والمليان .. يعني الراجل يزعلها تنكد .. يفرحها تنكد .. وبعيد عنكم .. نكد طويل .. يعني الراجل يروق حسب قلبه .. لو قلبه اسود يروق بعد اسبوع .. ولو بني يروق بعد 3 ايام ولو بيج .. يروق بعد يوم .. ولو ابيض يروق بعد الخناقة ..
اما الست تروق بعد ؟؟؟ قولوا انتم ياستات ؟؟
والنكد انواع .. فيه نوع منه بعيد عنكم بيخلي الراجل يكره نفسه ,, ويكره البيت .. وبعد ما يكون بيحافظ على بيته ومش عاوز يخربه .. ولا يفرط في بيته وعياله .. يبيع كل ده ببلاش ..
اكيد الراجل محتاج مرح وهدوء .. وده بيلاقيه بره .. عند واحده تاني .. بيحب ان يرتبط بيها .. وساعتها يحصل اللى يحصل .. والست تقعد تحكي لأصحابها عمل فيه وسوى فيه ابن ال.... بعد ما عملت له وسويتله ..
3- قلة الاحترام ..
وده عيب بيقع فيه ستات كتيرة .. يعني بتعتبر زوجها ملك ليها .. وانه اهله ربوه وخلفوه وكبروا فيه واصبح راجل وكبير في السن والمقام وبعد كده تيجي الهانم تقل قيمته وتبهدل فيه .. وتكلمه من طرف مناخيرها .. وكأنه هي الراجل وهو الست .. ولازم يحترمها ويسمع كلامها .. والا .. البند اللى فات ( النكد لو نسيتوه )
4 - عدم الاهتمام بالزوج ..
تلاقي الست في اول زواجها عامله البدع ,, واحمر وازرق وكاروهات .. ومهتمية بنفسها .. وبزوجها .. وبتراعيه .. هي ما صدقت لقت راجل يتجوزها بعد ما كانت حتبور .. بعد كده ايه اللى بيحصل .. اول ما تخلف .. تسيب الراجل اللى هو السبب .. وتروح للعيل .. ويبقى هو الدنيا بتاعتها .. والراجل ده على الهامش .. ياست خلخي بالك .. انتي ما خلفتي لوحدك .. ابدا .. العيل محتاج رعايه .. والعيل محتاج حنان .. والعيل .. طيب والراجل .. بح .. خلاص عمل اللي عليه زي ذكر النحل .. ويموت بعد كده ؟
5 - السن المتقدم :
الستات لما سنهم يتقدم بيزهدوا في الرجالة .. يعني مش بيطلبوهم كتير .. وده لازم تاخد بالها منه الزوجه .. الراجل ما شاء الله ميه ميه .. يعني سيدنا ابراهيم عليه الصلاة والسلام وعلى نبينا انجب وهو عنده 180 سنه . لكن الست لازم ترااعي ان جوزها محتاجها ومحتاجج حنانها ورعايتها ..بالعكس هو لما يكبر بيبقى عامل زي العيل الصغير وبيحتاج اكتر .. بس الست مش بتاخد بالها .. يقولها يام حسن .. اخبارك ايه .. تقوله معلش احنا حناخد زمانا وزمن غيرنا .. ايه .. كانت ايام .. طيب الراجل يروح فين .. ؟؟ قولوا انتم ..
والراجل يروح يعمل رومانسي بأه عشان يرجع ايامهم .. ويجيب بوكيه ورد احمر كده من بتوع الفلانتاين .. ترد عليه بالاغنية الجميلة دي :
قال جاي وجايب كام ورده فاكر ده يرجع ليالينا
لو كان الورد يجيب فايده كانوا كل اتنين زرعوا جنينه

6 - الغيرة
وما ادراكم .. لو كانت غيرة مرضية .. كلمت مين ..ومين كلمتك .. وبتضحك مع مين ومين ضحكت معاك .. وشوفي تليفونه ورسائله .. وشمي ريحة قميصه .. برفان حريمي ولا رجالي .. وياوليك لوو رحت حفله وانت في وسط الناس واحده جت سلمت عليك أو ضحكت لك .. يبقى نهارك ... لغاية ما يموت الحب مع الغيرة ..ولغاية ما تبدأ في فقدان التركيز .. وتشك في نفسها ( مش مالية عينه .. مش الوحيدة .. مش بيحبني ) والباقي عارفينه

هي دي الحكاية من اولها .. اما اخرها قلناه في الأول ..
العلاقة الزوجيه حاجه مقدسة .. وجميلة .. لو احسن استغلالها والعيش فيها بكامل الاحساس .. احساس زوج يجمع زوجتته اولاده بحنان .. واحساس زوجه محبه مطيعه ..تراعي زوجها كما امرها ربها ورسوله .. مش بس تفتكر ان الصلاة والصوم هما اللى حيدخلوها الجنه ..

والله انا ارى زوجات خارج المنزل افضل بكثير عنهن داخله ..
الست منهم تخرج من البيت ..وترضي بكل ذوق كل الرجالة .. وتجامل ده وتضحك في وش ده .. وتقبل على ده .. وجوزها اخر المهتمين بيه ..

اظن حكاية الزوجة والساحر والقرد موجوده .. واللى عاوز يسمعها حاقوله عليها .. بس يطلب ويأمر .. وتحت امره ..
بسم الله الرحمن الرحيم
{جَنَّاتُ عَدْنٍ يَدْخُلُونَهَا وَمَنْ صَلَحَ مِنْ آبَائِهِمْ وَأَزْوَاجِهِمْ وَذُرِّيَّاتِهِمْ وَالمَلاَئِكَةُ يَدْخُلُونَ عَلَيْهِم مِّن كُلِّ بَابٍ }الرعد23

انا استمتعت جدا بالموضوع

بس حضرتك في الآخر فتحت موضوع تاني

انا بقى مستني لما نشوف حكاية الزوجة والساحر والقرد وبعد كده نكمل كلام