فسيخ ورنجة وخس وملانه وبيض وحاجات تانية

ادي شم النسيم وايامه العاده هي العاده والناس ما بتتغير ، كنا واحنا صغار بنروح ساعات الحدائق وكان ما اكثرها الان مفيش حدائق الا النادر منها وكنت بشوف الناس في الايام دي نازلة على الحاجات دي ، منها اللى لسه موجود ومنها اختفى .. زي الملانة مثلا دي عبارة عن حمص اخضر وكان البيض الوان جميلة بنشتريها ونلونه في البيت وطبعا بالليل بناكله .. دلوقتي بسمع بس اللى بيحصل لأني تقريبا اصبحت بعيد عن الاحتفالات دي بدواعي الغربة ومش بنزل بلدي الا في الصيف

الفسيخ ده انا طبيعي ما كنت باكله ولا من صغري وده لأن امي الله يرحمها ما كانت بتحبه ، وكان ليها كلمة اذكرها في تحريم الفسيخ ، اه والله .. تحريم .. كانت تقوله دايما في المناسبة دي .. وهي جملة : الف سيخ في عين اللى يحلل الفسيخ .. شفتم السجع والشعر والفلسفة .. وكانت الله يرحمها مش بتحب المناسبة دي ولا تخلينا نخرج فيها .. لأن والدها اتوفي في التاريخ ده
حتقولوا يامصطفى كل شويه تقول لنا امك وامك الله يرحمها .. حاقول لكم دي مكنتش ام وبس وذكراها مش تاريخ او حوادث .. ياجماعه انا بفتكر امي كل ما بشوف نفسي في المراية .. طبعا انا مش جميل زيها .. لكن حملت شبه كتير منها ..
المهم نرجع للفسيخ .. هو مين اللى قال ان الاكلات مرتبطة بمعنى يمثلها .. انا اعرف مثلا ان الفلسطينيين بيجيبوا صدر كنافه لما بيكون فيه عزاء عندهم .. مع ان في مصر دي تعتبر عيب حد ياكل حلويات في العزا .. وحنروح بعيد ليه .. فاكرين ام علي . اللى سموا على اسمها الحلويات الشهيرة .. رقاق وسمن وسكر ومكسرات وقشطة .. عملتها بدم الولية شجرة الدر بعد ما قتلوها في الحمام
يبقى الناس ليهم حق يحتفلوا بالربيع والزهور مع الفسيخ .. مفيش تناقض أهو
بقالي حوالي عشرين سنة تقريبا ما حضرت شم النسيم في مصر .. وتقريبا نسيت شكله لكن اللى افتكره انه كان دايما هوا وغبار وتراب لأن دي فترة الخماسين ونشاطها
لكن اكيد شكله اتغير زي ما فيه حاجات كتيرة اتغيرت
ياريتها جت على الشكل والفسيخ والرنجه وبس .. دي كمان نفوس الناس اتغيرت وظهرت عندنا طباع وحاجات غريبة علينا ولغة جديدة كل سنة انزل اسمعها والناس اتفرقوا تقريبا الاهل بيسألوا على بعضهم بالتليفونات ولا زيارات ولا ترابط
وظهرت امراض اجتماعية اكتر بكتير من مسألة الفسيخ والرنجه .. الغريبة ان الاصل في بلدنا انها كويسه .. وساعات وانا ماشي في شوارعها اسأل نفسي سؤال ما بعرف اجابته
هو مين السبب في التغيير ده ؟؟
الناس
الحكومة
الزمن
الاغرب من كده اني لسه شايف بلدي زي ما سبتها اول مرة من زمان .. حلوة وجميلة رغم كل اللى بيحصل فيها ورغم كل اللى بيتقال عليها .. عارفين ليه ؟؟
لأن المنظر القديم بجمال وطيبة الناس والعادات والاخلاق الجميلة لسه فاكرها .. ولما بشوف في الفترة الصغير اللى بنزل فيها التغييرات السلبية دي بحس انها عارض وحيزول وحترجع احلى من الاول .. وانا مصدق نفسي وواثق من كده حتى لو احنا ما قدرناش .. حيجي اللى بعدنا يرد الوجه المشرق ليها تاني
هو انا طولت في الرغي
احنا كنا بنقول ايه ؟؟
اه فسيخ ورنجه
ما خلاص لازم ابعد عن الحاجات دي .. اصلها بترفع الضغط
وعلى فكره الحاجات اللى حكيت لكم عليها بترفع الضغط اكتر
ربنا يمتعكم بالصحة والعافية .. والضغط المضبوط .. ويسعدكم

والله يااستاذ مصطفي موضوع الفسيخ والرنجه اعرف ان في ناس اتعلجت منه
وفي ناس تانيه لسه عندهم ادمان عليه
وبماسبه التغير الي بيحصل فمصر الفسيخ كمان اتغير سمعت ان كان في كميه فسيخ موسمم نزلت الاسواق
وطبعا ده الجديد اشمعنا الفسيخ
ما كل حاجه بتتغير
الواحد خايف ينزل مصر يسمع ان الهوه اتسمم
اما عن ذكريات الماضي وفلسفه الست الولده
اكيد كانت عظيمه لانها انجبت ابن عظيم ووفي لذكراها وكلمتها والبيض الي كانت بتلونه الصبح
ربنا يرحمها ويسكنهافسيح نجناته ويبارك فيك لانك شبها

لسه اباء وامهات كتير بيحاولوا (اجتهادا) الحفاظ على القيم والتقاليد القديمه بصرف النظر عن انها خطأ ام صحيحه

عجبتنى حكمة الوالده فعلا... الف سيخ في عين اللى يحلل الفسيخ

ورغم خطورة وكثرة فساده وخصوصا في الاونه الاخيرة الا ان فيه اقبال.. بل ادمان عليه بشكل كبير

تقريبا ضبطوا السنه دى 14 طن فسيخ مسموم .. ولما سمعت الخبر ده استغربته كتير ..
ماهو اصلا الفسيخ سمك بايظ وفاسد يبقي ازاى 14 طن بس مسمم.. المفروض يبأه كله مسمم

وناس تانيه بتقولك.. مدام بنحط ليمون وبناكل بصل يبأه ماتقلقش كل دى مضادات حيويه.. تمنع اى تعب يظهره الفسيخ..
مع ان اشك ان فيه شئ بيأثر فيه..

وبناكله برضو

وانا واحده منهم.. رغم كل الكلام ده

لكن السنه دى محاولت اقرب منه اطلاقا ولا حتى السنه الـ فاتت

انما الترمس والحلبه المنبته والفاطئر دى عاده ويمكن بنحاول نتمسك بيها شويه

منها فرحه للبيوت والاولاد ومنها لجمع الشمل ومنها احياء ذكريات جميلة

فروائح زمان بتهل علينا

وكل بلد وحتى كل منطقه ولها اسلوبها وعادتها

يمكن تلاقي اكتر الاماكن مرتبطه بالتقاليد هى مناطق الريف عن المدن الكبيرة

وده اكتر شئ بيميزها

ايه رغيت كتير ... انتم السبب .. كل عيد ربيع وانتم بخير وبعيد عن شم الفسيخ ..

sixm2005 كتب:: والله يااستاذ مصطفي موضوع الفسيخ والرنجه اعرف ان في ناس اتعلجت منه
وفي ناس تانيه لسه عندهم ادمان عليه
وبماسبه التغير الي بيحصل فمصر الفسيخ كمان اتغير سمعت ان كان في كميه فسيخ موسمم نزلت الاسواق
وطبعا ده الجديد اشمعنا الفسيخ
ما كل حاجه بتتغير
الواحد خايف ينزل مصر يسمع ان الهوه اتسمم
اما عن ذكريات الماضي وفلسفه الست الولده
اكيد كانت عظيمه لانها انجبت ابن عظيم ووفي لذكراها وكلمتها والبيض الي كانت بتلونه الصبح
ربنا يرحمها ويسكنهافسيح نجناته ويبارك فيك لانك شبها

ربك ستار وحليم .. المشكلة مش في تسمم الهواء ده مقدور عليه
المشكلة في تسمم النفوس والارواح والقلوب وده مالوش حلول
اشكرك على تعليقك الجميل واتمنى لا تحرمنا وجودك باذن الله

صافي
اشياء كثيرة مرتبطة بالمناسب .. المشكلة اننا نخرج منها باشياء جميلة مثل ذكرياتنا
وايضا بصحة وعافيه اتمناها لك وللجميع من محبي الاكلات المالحة وربنا يعين
صحتهم عليها اما احنا كبرنا واللى كان ينفع زمان ما ينفعش دلوقتي لازم نحترم
نفسنا وبلاش مغامرات تقلب في ألاخر بأن تكون المناسبة الم في المعدة ..
خليها كده بدون الآلآم احسن وكل سنة وانتي طيبة