حوار جارتنا كل يوم مع جوزها

مساء الخير عليكم كلكم
ده حوار جارتنا مع جوزها الساعه 4 الفجر
هي :يابو محمود اصحي ياراجل اقوم بقا
هو: فيه ايه بتصحيني ليه دلوقتي
هي: قوم اخي عايزاك الله
هو: وهي حبكت تعوزيني دلوقتي
هي: قوم وخلاص مش كفايه بتشتغل من الصبح لحد الساعه 2 الفجر وسايبني لوحدي
هو: كويس انك عارفه حكايه الساعه 2 الصبح يعني ملحقتش انام حرام عليكي
هي :يعني اكلم نفسي واروح اخبط علي الجيران علشان اكلمهم
هو: خير ياست
هي: انا زهقانه كل يوم ما بين ماما وقرايبي ومفيش جديد
هو: عايزه ايه من الاخر
هي: عايزه اشترك في نادي
هو: بتصحيني دلوقتي علشان تقول لي كده انا كنت عارف انك مجنونه ياما حسيت بكده
بس كنت بقول ياواد ده كسوف زياده بس انت طلعتي مجنونه ونص
هي: بتقول عليا مجنونه انت ناسي يوم ماجيت لماما علشان تخطبني وكنت لابس شراب مقطع
بان لما قلعت الجزمه علي الباب
وكل اهلي قالوا لي
طنط ناني وطنط الفت واونكل تيتو ملقيتيش الا المعفن ده وتتجوزيه وانا اللي وقفت قدامهم كلهم علشانك
هو: ايه لازمه طول اللسان ده علب الصبح وبعدين حكايه الشراب ده صفحه وانتهت من حياتي
مش كل شويه تذليني بيها
هي: خلاص المهم انا عايزه اشترك في النادي اللي بتروحه ميمي بنت خالتي والا هي احسن مني
هو:يعني بلاش ناكل وبلاش نشرب وكل الفلوس اللي عملتها في الغربه اشترك لك بيها في نادي انتي حصل لمخك حاجه
هي: هتعرف حصل لمخي حاجه ازاي لما الم عليك الناس يابخيل مستخصر فيا 60--70 الف جنيه
اشترك بيهم انا كان لازم اعرفك علي حقيقتك يابو شراب مقطع
هو::قولت لك بلاش السيره ديه والا قسما عظما
هي :قسما عظما ايه ؟؟؟؟هتضربني ؟؟انت فاكر اخر مره لما زعقت وكلمت خالي في القسم وقولت له
وجالك ومعاه اتنين عساكر وسحبك للقسم وعبطك ورجعت وقفاك احمر والا ناسي
هو:: خالك ايه ياحلوه خلاص طلع علي المعاش والا نسيتي
هي ::اه بس خالي اللي في مستشفي المجانين لسه
و
و
وبعد اسابيع اشتركت جارتنا في النادي
وابو محمود اشتغل الشغلانه الثالثه من 2 الصبح الي الساعه 8 الصبح
طولت عليكم معلش

لأ دي قصة بأه ولازم تتكمل
خصوصا بعد ما اشتركت في النادي
عاوزين نعرف عملت ايه في النادس
وابو محمود اخباره ايه دلوقتي كملي
لسه بدري ياشمس الدنيا حتحلوا معاها
وتسود في وش ابو محمود ده لسه النادي
وقصصه والحاجات قصدي البلاوي اللى
بتحصل في النوادي
منتظرينك تكملي الجمال الى بدأتيه

شمس بارده حكيتك دي مثل لكل راجل مكافح في وجه الزوجات المفتريه
والزوجه المفتريه دي مش حاله فرديه لالالا
دي يظهر حاله عامه
وابو محمود ياعيني تفتكري هيعمل ايه في مراته المفتريه دي يختي الستات عيزين الحرق
والرجاله ليهم الجنه
وانا نفسي اكتب موضوع في القسم ده اشرحلكم ان الراجل ياعيني ديمن مظلوم
وان الستات لا خليها للموضوع الي هكتبه
وياريت تكملي حكايه الراجل الغلبان ده
تسلم ايدك علي الموضوع ده

والله ياجماعه انتم مش مقدرين حالاتانا فى البيت الواحد لازم يشم نفسه هو كمان شويه يعنى الراجل ابو محمود كل يوم خارج ومغير الوشوش والجو وهى ست ام محمود هاتطق وقاعده مابين اربع جدران

من حقها تطلع نادى تخرج تقعد مع اصحابها تعمل شوبنج

لالا لاانتم مش حاسين بينا خالص

الصراحه القصه روعه ونفسي تكمليها اختنا شمس باردة

تسلم ايدكى