حوار خاص بين ابن وابوه

الابن بيسأل:
بابا..هو انت كنت شاطر في المدرسة؟
الاب::
طبعا ..يا حبيبي كنت من الاوائل في كل المراحل الدراسية.
الابن::
بابا.هو انت اللي اخترت كليتك اللي درست فيها؟
الاب::
اكيد يا ابني حد يدرس حاجة ما بيحبهاش؟
الابن::
بابا..هو انت اللي اخترت ماما وحبتها ولاه جدو هو اللي قالك تتجوزها؟
الاب::
لا يا حبيبي هو ينفع حد يتجوز حد ما يعرفوش
احنا الانثيين اخترنا بعض وجدو بارك الاختيار
الابن::
بابا هو انت اللي اخترتلي اسمي ولاه ماما؟
الاب
لا ماما يا حبيبي وانا عجبني اختيارها
الابن:::
بابا ....هو انا لازم اخد قراراتي بنفسي زيك؟
الاب :
اكيييييد يا حبيبي من شابه اباه ما ظلم
الابن ::
بابا ...ازاي عوزني اخد قرارات حياتي بنفسي وادخل كلية الحقوق زيك؟؟؟
وانا ما بحبش المحاميين ولاه دراسة الحقوق اساسا؟
الاب::
عشان تبقي زي ابوك راجل ناجح ونافع لنفسك وبلدك
الابن::
انا عاوز ادرس فنون جميلة.
الاب::
ودي اخرتها هتكون ايه؟
ولما تخلص الكلية هتبقي بتشتغل فين ؟وايه؟
ولما اروح معاك اخطبلك بنت صديقي اللي انا اخترتهالك هقولهم ابني بيشتغل ايه؟
انت لازم تشيل الفكرة دي من دماغك خالص ..وتنسي لكلام الفارغ ده وتفكر في كلام ابوك اللي عارف مصلحتك اكتر منك
الابن::
بس انت كده بتلغي شخصيتي وبتحولني من انا لكوبي من حضرتك وده ما ينفعش؟
الاب:::
انت بتناقشني في ايه ؟انت خبرتك كلها كام سنة ؟
ولاه تعرف الدنيا ولاه شوفت حاجة فيها لسه وبكرة تفهم الكلام ده وتقول ابويا كان علي حق.
المناقشة انتهت وماعنديش كلام غير اللي قولته
الابن::
وانا بقول لحضرتك انا هفشل في دراسة الحقوق ..صدقني ما بحبهااااااااش
الاب::
ازاي تفشل وانا اكبر محامي في البلد يا ولد انت
انا هذاكرلك واديلك خبرتي كلهاا
الابن:
بابا................
الاب :::
انتهي .....خلص الكلام واتقفل باب المناقشة
وانتهي كمان كل الحوار بينهم وظل الابن شريدا ومختل الفتكير فيما سمعه من ابيه!!!
والان اكيد وصلت رسالتي للجميع وسأترك ردودكم بابا للمناقشة

جميل الحوار إيها الليالي الجميلة
ووصل المغزي المطلوب بحمد الله
ومثال لذلك أمامي في المحيط العائلي
طالب متفوق ويحب الشعر والفن
حصل علي مجموع مرتفع في علمي يؤهله لدخول كليات الفمة
طلب من أبوه أن يدخل أداب ليتشبع بالأدب والشعر الذي يحبه
كاد الأب أن يغشي عيه
وأخذ يتحدث عن أبنه في الوسط العائلي علي أنه مسه مس أو غير منتظم التفكير
أمام الضغوط دخل الأبن ما يريد الأب
رسب أول عام ثم بدء ينجح بالكاد وهو يقول
مين قالكم أنا عايز طب؟؟؟
من المخطئ ؟؟
أنا نفسي لا أدري
وأن كان تعاطفي مع الأب لأرتباط الشهادات عندنا بالوضع الأجتماعي والتعيين
شكرا لطرحك

حوار جميل ورائع والرسالة وصلت بالكامل وهذا الفرق بين الاجيال اختي العزيزة

أقتراب المسافه بين حكم الاباء وخبراتهم .. مع قدرات وميول ومواهب الأبناء (كهذا الامر الخاص) مطلوب بشده وبصفه مستمرة اي على طول فترة مراحل الحياة من الطفوله الى النضج

حوار شيق وأيضا قيّم وموضوع هادف للغايه

الشكر كله لليالى الدافئه

مع كل التوفيق

استاذ باهي ....ابرار الجميلة ....وردة المنتدي ..استاذة جميلة
لقد تشرفت بكم جميعا وبأرائكم القيمة والتي ثقلت موضوعي وبالفعل كما اجمعتم جميعا ان هناك فروق بين تعاقب الاجيال واختلاف تفكيرهم واختيارتهم لرسم صورة خاصة لمستقبلهم القادم
ولكن ليس عيبا في التربية ان يختلف كلا من الاب وابنه او الام وابنتها
هذه من وجهه نظر الحصة النفسية علامة صحية لا العكس.
ولكن
العيب في تجميد العقول وقوقعة التفكير علي طريقة وحدة ودرجة نجاح وحدة وتقييم الامور بميزان واحد من وجهه نظر وحدة فقط.
اشكركم عائلتي التانية واتمني دوما ان اكون عند حسن ظنكم بي.

طبعا معاكي قلبا وقالبا
وهو ده المغزي من موضوعي المتواضع اني اعرض المشكلة او الرسالة لكل اب وام
ليس بالضروري ان يكون ابن الدكتور ..دكتور
ولا ابن المدرس ..مدرس؟؟
لكن ممكن نقول ان ابن الوز ..عوام
صافي
المهم اننا نقدر نلاقي وسيلة اقناع للاباء وامهات ان التغيير امر حتمي ومطلوب ونافع ومفيد
ومش مهم الكسب المادي من ورا الشهادة لانه لو درس طب غصب عنه هيكون دكتور فاشل ومش مجاري التطور الطبي ولا مهتم بتقدمه
يعني حتي الكسب المادي من ورا الشهادة دي هيكون له نتيجة كسية
الموضوع مهم بجد ومن اصعب ما فيه تغيير العقيدة اللي جوة كل اب وام
وربنا المستعان

اسمحى لي اختى اليالى الدافئه الغاليه احكيلك قصه تشبه حوارك كتير وشوفي مدى تأثير فكر الاباء على اولادهم

لى أخت أكبر منى كان لها هوايات رائعه .. تحب التفصيل والتطريز والرسم والتشكيل والتصميمات بكل الانواع سواء ملابس او مفارش او انتيكات او زهور كل ماتتصورى فى الحاجات دى ولها حس فنى رائع وذوق الجميع يشهد له

وأخدت الثانويه العامه من السعوديه ولما جت تكتب تنسيقها هنا كانت والدتى وقريبنا بيكتبه
المهم هى اتمنت تدخل تربيه نوعيه علشان تثقل موهبتها دى وتتعلم وكانت متعبه جدا فى المذاكرة او التعليم مش استهتار منها ولا حتى غباء لكن ميولها مكنتش فى المواد دى وخصوصا انها كانت بتكرهه تماما الرياضه ومكنتش تفهمها خالص وكانت ادبي

والدتى رفضت رفض بااااات وقالت مستحيل ادخلها تربيه نوعيه يعنى آخرتها تكون ايه؟؟؟

لازم يكون معاها شهاده محترمه

وكانت ايامها التربيه النوعيه بتاخد مجموعات اقل بكتير عن السنه بتاعتى وعن دلوقتى

المهم وقفت لها كتير واختى كانت بتبكى ليل ونهار نفسها تشتغل بايديها الاشغال دى وتصمم هى وتتعلم الطرق الصحيحه وبتعليم صحيح مش تكون مجرد هوايه
وامى تقولها مش ممكن ابدا هاتكونى اسمك مدرسة ابتدائي بتاعة رسم والناس تقول ايه؟؟؟؟؟؟

(على اساس ان في شغل )
المهم كانت الافكار ايامها مختلفه
ودخلتها حقوق
وهى ماتعرفش اى شئ عن المواد دى ولا بتعرف تحفظ

سقطت فيها

حولت لتجارة وهى كرهها الرياضه مابتعرفش تفهمها او تذاكرها لان دى قدرات

اقولك قعدت كام سنه؟
9 سنين
شوفي ضاع من سنها كام سنه

اضيفي السنه الحقوق يعنى عشر سنين فى الدراسه

وطالعه كرهت التعليم اكتر بالدارسه بالرياضه وصدقينى مش ممكن تقدر تشتغل بشاهادتها لانك زى مانتى عارفه مصر هنا مابتعلمش خصوصا فى الكليات دى
يعنى من الاخر طالعه بورقه اسمها شهاده وبدون اى معلومات وبس

حاولت بعد الفترة دى تتعلم فى اى مصنع او مشغل تتعلم التطريز والتفصيل .. وشويه اتعلمت والباقي ماعرفتش الاساسيات خالص

وجاهدت كتير وجابت كتب ومجلدات واتصرفت لوحدها وبأت تصمم افكار كتير وبيتنا كل التزيين اللى فيه من ايديها هى والكل بيشيد على جمال شغها ده غير تفكيرها وذوقها فى الرسم والفن

ورسم الزجاج واختيارات الالوان

بصى موهبه مش عاديه ولا بسيطه وواضحه وصريحه ومش محتاجه اكتر من انها تتأسس

المهم طولت عليكى بعد الكلام ده بفترة طويله افكار امى طبعا اتغيرت فيها لما شافت معاناة اختى
وانا جالى تنسيقي كلية زراعه
ومن حسن حظى لقيت قسم اقتصاد منزلى اللى هو مريح لاى ست طبعا

وأكيد كان من ضمن القسم مواد للتفصيل وللديكور

اقولك كانت بتعمل ايه معايا؟
اختى طبعا

كانت ليلة الامتحان بالليل خالص اكون سهرانه بذاكر وبحفظ

وعلى فكرة انا لاعندى هواية مسك ابره ولا بحب موضوع التفصيل خالص ولا لى خيال واسع فى الديكور

وده مكنش اكتر من انى بتعلمه وبس

والموضوع ده كان بيتعبها اوى

تقوم قاعده جانبي وتبكى وتصعب عليه فأسيب المذاكرة واقعد معاها
تقولى انتى دخلتى الكلية والقسم ده بسهوله وباختيارك ورغم كده مش فى دماغك
اقولها ازاى مانا بذاكر
تقولى معندكيش حس انك تعملى بايديكى وتشتغلى ولا في دماغك
اقولها مانا على قد المذاكرة هما عاوزين ايه اكتر من كده؟
تحكيلى انها كانت ممكن تعمل حاجات فنيه وكانت تعمل وتعمل وتقدم للكليه وكل حاجه
وكانت هاتبقي غيري خالص
وتقولى ماما ضغطت عليه التجارة وانا بكرهها وكان نفسي ادخل قسمك
واقولها طب معلش تقولى ماتقوليش معلش وتتغاظ واحيانا تضربنى هههههههههههه ويضيع طبعا عليه الامتحان لان كل امتحان تحكيلى نفس القصه

اتفقت معاها بعد ماأخلص كليتى نقدم فى تربيه نوعيه
وحاولنا فعلا لكن الكليه اتغيرت مسارها خالص يعنى اقتصرت على العلمى بس وعاوزة مجاميع مختلفه وحاجات كتير اوى
وطبعا هى زهقت ونسيت التعليم وحتى موهبتها دى
ودلوقتى مابقتش فاكرة عنها اى حاجه
وعارفه دلوقتى لو قلتلها اشتغلى تانى اى مشغولات تقولك ولا اعرف ولا افتكر وتشوف الكتب القديمه بتاعتها اللى جابتها عشان تتعلم لوحدها تبص عليها بحزن وترميها بعيد

رغم ان كل فلوسها كانت ضايعه على الخامات اللى بتجيبها وتعملها وكل وقتها بيروح فيها وكان لها روح كبيرة ومثابرة لكن كل ده خلاص راح

مش بقول طبعا ان تفكير والدتى كان غلط.. انما كل انسان له فكر معين وميول تخصه وحده لان ماما مثلا مكنش لها اى ميول زى ميول اختى وبالتالى ماحاولتش تفهم رغباتها

اسفه جدا للأطاله شكلى فضفضت ونسيت نفسي

بس انا بقول القصه دى عشان بجد لازم نتعلم من اللى حوالينا ومش عيب اننا نتعلم مهما كبرنا

شكرا اختى ليالى انك خلتينى افضفض ده كله وربنا يكرمك يارب

تسلمى حبيبتى