ساعات بشتاق

عجبتنى أوى كلمات الأغنية دى

عشان تقريبا كلنا بنفكر فى كده

الاشتياق...

كتير بنسرح ونلاقى نفسينا بنرجع بذاكرتنا لورا

بنفكر فى حاجات كتير مرت على بالنا

بنشتاق للحظات دى

بنتمنى ترجع

ساعات بفكر فى طفولتى أزاى كانت

أيام المذاكرة الحلوة والصعبة

خوف أمى علينا وحضنها الدافى

رجوع أبويا من شغله وآثار التعب على جبينه

جرينا أنا وأخويا ورا بعض

ليلة رمضان لما كنا نفتح الراديو

ونستنى المفتى وهو هيقول بكرة رمضان والا متمم

ويفضل يطول فى الخطبة والأذن منصته

وأول ما يعلن مجىء رمضان

نصرخ كلنا ونحضن بعض

ويجرى أخويا عالشارع يجيب الفول والزبادى

ونسمع أجمل أغانى رمضان

رمضان جانا وفرحنا به

وفوازير رمضان الجميلة سمير وجورج

نيلى وشريهان

وفطوطة الشقى

وليلة العيد

نرجع نتلم ونفتح الراديو

ونسمع لنفس المفتى وهو هيعلن انتهاء رمضان

ساعتها بنفرح وأجرى على فستانى أحضنه

وشنطتى الصغيرة

وبابا يدخل علينا

جايب لنا البلونات والصواريخ

ومذاكرتنا خصوصا الثانوية العامة

أه كان ليها رونق غريب

سواء فى امتحاناتها أو نتيجتها

كنا نتلم حوالين الراديو يرضوا نستنى نسمع أرقام جلوسنا

أو نجرى عالمدرسة ويجى المدرس اللى جايب النتيجة ونزفه ويشغل الميكرفون

ويبدأ ينادى فى الأسماء وتشوف مشاعر متناقضة مابين زغاريد بتتعالى وبكاء ونحيب

ولمة الشلة فى الجامعة ضحك ومرح وحرص عالحضور

ومذاكرة بالمجهود مش بالسناتر والدروس

أأأه يا أحلى أيامى وذكرياتى

أكيد موضوعى فكركم

ونفس مشاعرى حاسنها

هسيب لك القلم تكمل ورايا

بتشتاق لأيه