ايام العيد وكل سنه وانتم طيبين

e]]انا اول كل عيد كبير ازعل اوى ليه بقي؟؟؟؟؟؟

عشان انا نفسي يعملولى عيد للرينجا زى ماعاملين عيد للحمه

انا مابحبش اللحمه

نفسي يقلولى تعالى كلى فتة رينجا ههههههههههههههههههههههههه

احكيلكم بقي الطقوس اللى بتكون فى عيد الاضحى المبارك ويوم العرفه وقبل كل شئ كل سنه وانتم بصحه وخير وسعاده يارب ومتجمعين مع اعز الحبايب والغالين وزايدين كلنا مش ناقصين ابدا يارب

يوم عرفه ده طبعا كلنا صايمين فيه ومن اهم القواعد فيه الاكله الشعبيه المعروفه.. واللى والدتى مهما كانت تعبانه او (قرفانه مننا) لازم برده تعملها ولو حتىكلنا كارهين الاكلات دى

كوارع

فشه

كرشه

وممبار

فته

و....

لا خلاص بس كده

بصراحه بتعملهم حلوووووووين اوى ونفس اجداد الاجداد فيها.. وتحبيشات روعه... ومع ذلك ماباكلش الا الممبار

وممكن قرقوشه صغننه من الكوارع وبعد كده ماتتحايلوش عليّه مش هاكل خلاص ولا اى حاجه من اللى جبت سيرتها اللى فاتو دول ابدااااااااا

دى طقوس الاكل يوم الوقفه وطبعا اليوم ده انا ماعرفش انام فيها ابدا .. كله الا ليلة العيد دى بالذات وسبحان الله اول يوم ده بيكون ليه طعم غير خالص غير الايام التانيه بتوع العيد

بنبقي بنروق البيت كلنا ونجهز حاجات الضيوف والتحيا وكلمة معتاده دايما بينى وبين والدتى في ليلة العيد الكبير..دايما تقولى هانقدم ايه بس للضيوف فى العيد؟؟؟ اقولها قدمى لحمه طبعا .. حطى فى البونبونيرة قطع لحمه صغيرة بدل الشيكولاته ..

كانت كلمة تريقه منى لكن اكتشفت فى يوم من الايام ان فعلا اهل ليبيا بيعملوا كده فعلا بيقدموا فى العيد الكبير قطع لحمه صغننه كتحية لضيوفهم,,, وقولت طب وفيها ايه لما نعمل كده؟

بس احنا طبعاااااا مابنعلش كده خالص

أحنا بنقدم الغدا والعشا تحيه ههههههههه

وده لازم ...

اصعب حاجه فى الليله دى بقي واللى بخاف منه اوى وبقلق منه هو صوت الخرفان بالليل بيكون صوتهم مخنوق ومحشرج وبيقولوا ان ده صوتهم لما بيكونوا عارفين انهم عارفين انهم هايموتوا ونقتلهم

ساعتها بخاف اوى وبيصعبوا عليه اوى

بس مجرد ان الصبحيه يجى والصلاه تبدأ والتكبيرات الجميله.. والشعور الحلو يدخل كل بيت ساعتها بننسي الخوف والقلق والضلمه بتاعة الليل ونبدأ بالطقوس التانيه فى يوم العيد الفطار بتاعنا بعد الصلاه .. لازم طبعا الكبده بأنواعها.. وكباب الحلة والسلطات ودى كانت من اختصاصاتى.. اى حاجه فيها خل يبقي من اختصاصاتى

وبعد كده يبدأ الناس تيجى من ساعه الصلاه لما تنتهى الساعه 7 تقريبا لحد الظهر واحد يسلم التانى ههههههه ويالا يامنى اشتغلى قهوجيه

ولازم طبعا ماما تنادينى وتوقفنى ادامهم شويه وتقعد تعرض عليهم: تحبوا تشربوا ايه؟ تحبوا تاكلوا ايه؟ تحبوا تتحلوا بإيه ويقعدوا يتعازموا على بعض تقريبا تلت ساعه وانا اقف حاطه ايدى على خدى والاخر اطلع فيهم مانا خلقى ديّق جدااااااا واقولهم انتم هاتتعازوموا على راسي انا فى الاخر وانا اللى هاعمل

اخر كلام عاوزين اييييييييه؟
الناس تخاف وتطلب وتسكت,.,, واحيانا يقولوا ماتتعبيش نفسك

وساعتها والله برتاح

ههههههههههه

لالا هاقوم طبعا اعمل معقول يعنى.... مانا وقتها باخد كلمتين حلوين من اللى قلبي بيحبهم ههههههه

رغم ان بيتنا مش بيت عائله الا ان الحمد لله والدى ووالدتى محبوبين بين عائلاتهم جدا ولازم الناس هى اللى تيجي لينا ومابنروحش بقي لحد وببقي نفسي اوى نروح ونخرج فى العيد بس للأسف مابنعرفش خالص عشان الضيوف وعشان برده العيد صعب الخروج فيه.....

احلى حاجه طبعا فى العيد العيديه ومالهاش دعوه دى خالص بأن ده عيد اللحمه ولا الفرخه ده اسمه عيد يعنى عيديه وبس.. وبما انى اخر العنقود يعنى احيانا الناس تقتصر عليّه انا العيديه بس واخواتى يتخانقوا معايا وانا طبعا عمرى مااطلع شهمه ابدا ولازم ماديلهومش حاجه خالص منهاا

بس فى الاخر بديهم غصما واقتدارا وانا مش راضيه عنهم خااااااااااااااالص

ايام جميله عارفه ان مش هاعرف اعوضها ابدا وغاليه على قلبي خصوصا اول مايأذن الفجر وبعده العيد اروح ابوس ايد بابا وماما وراسهم .. صحيح ببقي قبلها مغلباهم وبرد كل كلمة والتانيه زى البتاع بس لازم ابوس راسهم وايديهم ربنا يبارك فيهم وخليهم لى يارب

وبعد مااسلم عليهم اروح اشغل اغانى العيد وافرح فيها شويه اهو نفرح نفسنا

حكاية لبس العيد بقي ولاحاجات دى الصراحه نسيتها من زمان خالص بس فى شعور غريب بيطغى جوة البيوت رغم ان مابيكونش فيها تجدد وان الاشخاص هما هما وان الشخصيات والمعاملات واحده وحتى شكل البيت مابيتغيرش الا ان العيد بيضيف شئ جميل اوى فيه وهى ان النفوس بتتغير شويه وتلاقي الزوجه مهما كانت كارهه زوجها او ارفانه من عيشيتها انما بتروح تطبخ اكل العيد بكل نشاط وحب وبتحرص جدا جدا انه يطلع مضبوط عن اى يوم تانى بيعدّي عليهم وبتحرص انها تضيف شئ جديد فى البيت.. وتلاقي اهل البيت بيحرصوا بقدر الامكان انهم يمسكوا نفسهم والسنتهم وافعالهم عن اى شئ وحش ومشين او اى حزن او زعل ويقولوا احنا في عيد بلاش

اد ايه العيد بيصلح بين النفوس وبيصلح النفسيات وبيريح الاعصاب غير انه بيدخل البهجه لقلوبنا تلاقي الواحد بيبقي منتظرة عاوز يفرح.. يغير جو حتى لو مع ناس عارفهم وعايش معاهم طول عمره

دلوقتى نقول سبحان من مجمعنا الله اعلم السنه الجايه لما تيجى كل واحد هايكون فين

ربنا يجعل ايامنا كلها سعيده ويطرح فيها البركه

انا رغيت كتير وصدعتكم اول يوم العيد

حبيت احكيلكم شوه عن ذكريات العيد وايامه فى حياتى وتعالوا احكولى انتم كمان عن ذكرياتكم فى العيد وايامكم وبتعملوا ايه فيه

كل سنه وانتم طيبين[/b]

موضوعك جميل جدآآ يامنى ..

تعرفي هوا مش حسد بس اتمنى ان يكون العيد عندنـآآ مثلكم ...
فيه شي جديد ..

وكل عام وانتم بآلف خييييييييييييييير ..
عيد سعيد

وانتى بخير وصحه وسعاده اماسي طيب احكيلنا حبة عن العيد عندكم وقوليلى ذكرباتك لو تحبي

عيد سعيد عليكى

» 100 نكتة عالماشى لزوم العيد وكل سنة وانتم طيبين
» في ايام الطفولة (لاسبوع الصراحة )
» خمس ايام
» كل عام وانتم بخير
» كل سنه وانتم بخير