اسئله تجيب العصب

فى موضوع جميل كذا عضو
بيتكلمو فيه عن ( الأسئلة الرخمة اللى مببحبش حد يسألها ) زى

خلـونـــا نشــوف أمثلة

***********
رجع من بره تقعد ترن الجرس لحد مصباعك يورم ويجى حد يفتحلك الباب يقولك ايه ده انت جيت
"لا طلعت اضرب الجرس عشان اتاكد انو سليم"

***********
فى حاجة كمان رخمة اوى لما تكون انتة وواحد زميلك هتركب المترو صاحبك بيقطع تذكرة وانتى عديت يقولك هو انتة معاك اشتراك؟؟؟؟
((مفروض تقولة لا انا ابن صاحب المترو))

***********
وى كده لما تبقى راجع من بره و تقول
ياااااااااه ده انا هموت من الجوع......فورا يقولوا يعنى هتاكل
((اكيد مش هتفرج على التليفزيون))

***********

إنت في أوضتك .. على السرير وطافي النور ومتغطي
ييجي أخوك الظريف ويفتح الباب عليك ويقول : ايه ده انت هتنام ولاّ ايه ؟

(( أظن ده مش وضع الرقص !!! واضح ان انا هنام ))

***********

انتم معزومين عند ناس ورحتو لبيتهم وأول ما فتحولكوا الباب يقول ابنهم الصغير: انتوا جيتــواااااااااااااااا ؟

(( لا لسه ))

***********

والعكس : انت لابس هدومك و متأنتك و على سنجة عشرة وريحة البارفان واصله لاخر الشارع .. وخلاص بتفتح باب الشقة,, يجي حد من أهلك وينادي بصوت عالي : انت خااااارج ولاّ اييييييييييه

(( !!! لاء دانا لسه راجع ))

***********

أو مثلا راكب العربية ودوّرتها وخلاص هتطلع ... يجيلك لك البواب ويخبطلك على الزجاج,, انت بكل ذوق تفتح الزجاج وتقوله : خير في حاجة؟
يقولك : انت رايح الشغل يابيه ؟

(( لا.. العربية واحشاني ))

***********

مثلا ماسك سماعة التلفون وقاعد تضغط الارقام يجي حد من أهلك ويقولك: انت هتتكلم في التليفون ؟

(( لا.. بتفرّج عليه ))

***********

مثلا : ماسك مذكرة أو كتاب وقاعد تحفظ ومتحمس (أول مره بقى) .. جه حد وقالك: هاه.. قاعد تذاكر ؟

(( تقوم رامي الكتاب و تقوله لااااااااء كنت بدور على ورق احط عليه بطاطس محمره ))

***********

ربنا هاديك كده ... ماسك سبحة و عمال تسبّح ، يجي حد من البيت يعدي عليك ويقول: هوّه انت بتسبح ؟

(( لاء.. هفرطها و أسلقها ))

***********

ولاّ تعالــو شوفو قنواتنا واسئلتهم البديهية البايخة
برنامج اهداءات يتصل واحد يطلب أغنيه
ترد عليه ست الكوتكوته (المذيعة) بكل خفه ورشاقة : إنتا بتحب الاغنيّة ديه ولا ايه ؟

(( لاء.. طالبها اخنق على نفسي ))

***********

أو مثلا في العيد

المذيع : هههههه هههههههه هههههه نتعرّف بيك
المواطن : فلان الفلاني
المذيع :هههههه هههههه هههههه بتقول ايه للأهل ههه و صحابك ههه وقرابيك هههه و للناس اللي انت مخاصمهم كمان ؟ هههههه هههههه ههههههه
المواطن : أقولهم كل عام وأنتم بخير

(( السؤال ده يفرس لدرجه انى بقى هقتل المذيع واكيد مش هقول جو تو هل))

***********

,,,المذيعة الظريفـة : وياترى بقى هتعملوا ايه العيد ده هتقضوه ازاي ؟
أكيد بيبقى زيارات الأهل و الصحاب و تخرجوا تشوفوا مظاهر العيد في الشوارع و تفسحوا أولادكم ونتصل بالمعارف نعيّد عليهم و نقولهم كل سنة و انتو طيبين

(( سبتيله ايه يقوله يارخمة ؟ ))

***********

والأسخف بقى ... الشلل الكبير.. لما المذيعين يكلّموا الاطفال
يقول المذيع للطفل : إنت بتحب ماما وبابا ؟

(( يعني أساسي الواد لسه ما طلعلوش عرق الندالة علشان يقول لأ ))

زي الست اللى بتصحى جوزها من النوم
وتقوله .. انت نمت ولا لسه ياحبيبي
(برضه حيقولها ابدا بس كنت باكمل الحلم بتاع امبارح )

مرة واحد صاحبي كنا صغيرين لسه .. ودخلنا الجامع وكان هو ما يعرفش
باب الجامع الا في المناسبات ولا يعرف الصلاة اصلا
ولما دخلنا واحد واقف بيصلي .. راح شاده من كتفه وقاله .. بتصلي ايه
الظهر ولا العصر ؟؟
يعني عايز الراجل يطلع من الصلاة عشان يقوله ؟

ومرة كنا راحين سينما مترو وواحدة ظريقة بتقطع تذاكر
وكنا خمسة افراد .. لما قطعت لنا التذاكر سألتنا سؤال جميل
انت حتتفرجوا انتم الخمسة على الفيلم .. ده فيلم حلو اوي
قلنا لها لأ واحد بس حيتفرج ويحكي للباقي .. ولو سمحتي
رجعي التذاكر الأربعة

وفيه سؤال عجيب ربنا ما يوريه لكم خالص
اللى هو قبل الاعدام .. بيسألوا الراجل اللى حيتعدم
نفسك في ايه قبل ما تموت .. تفتكروا عنده نفس اصلا

وآخر حاجه حصلت معايا بجد والله وحقيقية وانا في الكويت
اتصل بيه واحد من العجايده .. ومش حاقولكم ينتمي الى اي
جنسية .. خلوا بالكم العجايدة مش الصعايدة لاقدر الله
دول اسخم منهم بحوالي 14 محطة مترو
اتصل بيه على موبايل .. وقالي الو .. قلت الو
قالي الاستاذ ايمن .. قلت له انا مش ايمن ولا ايسر
قالي ايه السؤال ؟؟؟
امال تليفون الاستاذ ايمن ايه امال ؟؟؟
طب اقوله ايه والنبي ؟
بصراحه .. وربنا يسامحني .. قلت له استني شويه
هو اللى متصل (واخدين بالكم ) وقعدت يجي 5 دقائق كده
الراجل قلق والمكالمة عمالة تتحسب .. وقالي بتدور على ايه
قلت له انا فاتح دليل ا لتليفونات وباشوف لك ايمن تليفونه كام

ههههههههههههههه
والله معاك حق
حجات تجيب الضغط
واوقات برضو بتكون تصرفات مش اسئله
مثلا لما تبقى البطاريه بتاعت الريموت كنتورول ضعيفه
بيقعد الواحد مننا يدوس على الزرار بقل قوته
قال يعني كده هيشحن البطاريه
او لما يتأخر عليك المصعد ( الانسنسير )
نقعد ندوس على الزرار بقل قوتنا
كأنو هيعدي دور ويسيب دور عشان يوصلك بسرعه

قعدنا نرغي ونسيت اقولك
شكرا على الموضوع الجميل

الله عليك يا استاذ مصطفى
مش بقولك
ومن كتر ما اتعودنا على كده
وعلى الاسئله الرخمه
بقينا نستخدمها فى الحياه اليوميه
ربنا يقدرنى
واولع فى الناس اللى اخترعت الاسئله دى

هههه
مش بقولك يا ثلوج
وعلى فكره ده اكتر نوع تعليق بحبه
ان اللى داخل يضيف حاجه
بس مش شكرا وخلاص
الف شكر يا تلوجه

» اسئله واجوبه للرجل وقرينته