والله زمــان

موضوع: والله زمــان الأربعاء يناير 07, 2009 2:00 pm

أحلى وارق صباح نقي\ مساء جميل عليكم

طبعا لايعلى عن الفن القديم فن زمان ومحدش يقدر يقول ويعيد فيه اى كلام.. فى كل زمن وفى كل وقت حتى فى اوقاته كان فى ازدهار كبير ورقي سامي في الفن واختياراتة واختيارات من يمثّلوه..

انا هاتكلم بالتحديد عن الاغاني القديمه اغاني زمان .. وتعالو نقارن بينها وبين الاغاني الجديده
طبعا مش هانلاقي مقارنه مهما حصل بس قبل مانفكّر ونحكم حبيت افكر معاكم في أمر: تفتكروا ناس ايام زمان مكنوش بيغلطوا او كان عندهم غلطات او تقصير فى آداء اى فن او فى الحياه عامه..

بما اننا بنتكلم عن الفن فخلينا احسن فيه..

معقول لما حد من المطربين لما كانو بيغنّوا ماوجهوش عقوبات الزمن بتاعهم او مصاعب فى آداءهم او مشاكل تقلل موهبتهم..

طيب هاقلوكم ايه سبب فكرتي دي:
كعادتى (ومش جديد عليّه) كنت بسمع اغنية لعبدالحليم ويمكن تعمّقت فيها جدا وسمعتها كتير صحيح نسيت فيها الدنيا (اكيد) بس ده مامنعش انى احللها وانقدها وافكر وابحث عنها شويه (مش بقولكم عادتى ) لقيت ان فيها فعلا تقصير والاغنيه بجد مليانه مشاكل..ومع ذلك كانت روعه روعه روعه.. مايتقالش عليها الا انها من أجمل الاغاني ومن اجمل أغاني عبدالحليم كمان.. والاغنيه هى مثال وليس الحصر ولا كلامى مقتصر عنها بس..
هى الاغنيه بالتحديد كانت اغنية زي الهوا

انتى بتقولي زى الهوا.. طبعا هازعّلكم بس والله انا بحبها كمان مابقولش فيها حاجه وحشه لكن الموضوع مش ان انا بتعيب عليها ابدا بالعكس..

لو فكّرتوا زي مابفكّر هاتوصلوا للنتيجة اللى انا وصلتلها..

وهيّ ان الناس دي فعلا وصدقا مايتقال عليهم غير:

عباقرة

عارفين ليه:
تعالوا شوفوا ادوات الموسيقى اللى كانت مستخدمه اياميها.. (انا مش ضليعة فى الموسقى ولا درست المجال ده ولا عندي اذن موسيقية اقدر احكّم بيها اللى بسمعه ولا هاويه وغاويه.. بس بسمع وبتعمّق شويه وبعمل فيها فلسفه..
الموسيقى وادواتها كمقارنه لأيامنا دي تعتبر بدائيه تماما.. يعنى طبله .. اكسيرفون.. بيانو.. كمانجه.. ومع ذلك برعوا فى انهم أخرجوا تراث من الفن لينا بنحكي وبنتحاكى عليه مش فى مصر بس لا فى الدول العربيه كلها..
ده مش بس كده.. واحد صوته رائع ملائكي زى عبدالحليم او ام كلثوم .. او غيرهم كتير من اللى ربنا اعطى لهم موهبه عاليه فى صوتهم وكانو بيقدروا يدرّجوا الصوت درجات موسيقيه منخفضه ومرتفعه رقيقه وغليظه ومع ذلك ومع كل القوة دي (لو دققتوا فى ايقاع الموسيقى مع الصوت) تلاقوا ان الايقاع بيحاول يواكب ويجاري جمال الصوت مش عارف.. ليه لان استخدامتهم وتكنولوجيتهم كانت قليله وبسيطه جدا وبالرغم من كده خرجوا لينا اروع واجمل الاصوات والالحان والكلمات مع انهم كانوا بيغنوا اغنيه واحده بس كل فين وفين والاغنية الواحده بتكون بالساعات ولا كانوا بيتنططوا على المسرح علشان التفاعل يكون فى اوجه ولا كانوا بيتحركوا.. لا ده كمان الجمهور كانوا بيجلسوا فى المسرح زى الطلبه فى الفصل المدرسي مكنش حد يقدر يتكلم او صوته بيعلى من شدة احترامهم وتقديرهم للمغنى الواقف مع انه مجرد مغني بيبهجهم.. واللى كان بيتكلم و بيصفّر كان المغني من ذوقه وادبه يسكت ويسكّت وراه الفرقه علشان الهرجله ماتزيدش.. يعنى قمة الاحترام المتبادل..

كمان كانت الاغنيه الواحده اللى بتقعد بالساعات واللى كانوا بيستنوها زى مابيستنوا العيد لما يجي .. كانت الجمل بتتكرر اكتر من مره وروحهم وبالهم طويل والفكر رايق والوقت متسع..

تعالوا بقى نشوف الزمن ده.. ونشوف التكنولوجيا وصلت لحد فين من مجرد طبله بتدق وودي جى وميت اورج وحاجات كتير اوى والاغاني فى اضمحلال تام وتدهور للحضيض..
والمغنيين يطلعوا يرقصوا والرجال دلوقتى بقوا اكتر من الستات فى الرقص والموضوع بيتركز على المهرج اللى بيتنطط ادام الجمهور علشان يتفاعل معاه وميت اغنية والوقت سريع ومفيش روح على ان الاغنيه تطول ولو المغنيه لابسه محترم او مابتتحركش يبقي دمها تقيل..
طيب نسيبنا من اللبس والتنطيط وخلينا فى الفن مادام بنتكلم عن الفن نفسه .. الايقاع اصبح اكتر اعتدالا واكثر انسجاما مع الصوت يعنى الموسيقى ماشيه صح مع درجات الصوت ده بسبب كثرة وتطور الالات الموسيقيه الحديثة وتجميلها ومع ذلك رونق الصوت بيضمحل..
حتى لما بنلاقي صوت جميل ونادر ومش موجود وكلماتها والحانها كويسه بس لو قارنا بينا وبين زمان هانلاقي ان زمان بيكسب بجداره..

يعنى مثلا: لو جيبنا اوحش اغنية سمعناها لزمان (وده امر نسبي بالنسبه لاذواقنا) وجيبنا افضل اغنية بافضل صوت بافضل كلمات والحان وقارنا برضو زمان هوّ اللي بيتسمع.. مع ان دلوقتى بيحاولوا يتفننوا وكلٍ بيتفنن فى الجهه اللى عاوزها..

الفرق كبير وواضح .. الفرق والموضوع اكبر بكتير من الاغاني ولا الافلام ولا الفن.. دي كل الحياة اتغيّرت

لكن هنا بنتكلم عن الفن بالتحديد لان مفيش اجمل من ان نذكر الفن الجميل الاصيل بتاع زمان ..وعشان كده مانقدرش نتكلم عن الفروق الوقتيه او الفروق فى الموضوع وحياة زمان عن حياة دلوقتى عشان مانخرجش عن موضوع الفن وبعدها نخرج عن القسم نفسه..
خلينا هنا افضل واجمل..

ياترى علشان نرجع زى زمان بجماله ورونقه عاوزين ايه: عاوزين نرجع لبدايات الالات الموسيقيه.. ولا عاوزين نملأ الاوقات اللى المفروض دلوقتى تكون اطول من زمان نظرا لتطور الحياة وتسهيل الامور فيها وبالرغم من كده مابنلاقيش وقت كتير فى يومنا العادي.. ولا عاوزين نرتقي احنا بكلماتنا واحاسيسنا.. ولا هى الاحاسيس نفسها جوانا مابقتش صادقه ونقيّه كفايه علشان نرتقى زي زمان..

نفسنا نعمل ام كلثوم وعبدالحليم وورده وفريد الاطرش ونجاة وعبدالوهاب وشادية تاني
وعلى فكره الناس دي كل واحد كان ليه لون مختلف عن التاني يعنى ماكانوش سيستم واحد بيمشوا عليه
يعنى فى الشقي وفيه الهادي وفيه المحب وفي المجروح وفي السعيد وهكذا..

يعنى مايعتبروش اسم واحد ولا بيجمّعهم فى اذهننا الا زمانهم بس لكن كل واحد منهم بيتسمّى بأسمه علشان له لون خاص بيه..
وبالرغم من تحديات الزمن وبالرغم من قلة الموارد وقلة الوقت فى حياتهم ابدعوا لنا تراث مش فى الفن بس لا ده حتى فى طريقة لبسهم وجمالها وطريقة حياتهم ومعاملتهم وبساطتهم..

تفتكروا مش يستاهلوا مع كل ده ونقول عليهم عباقره..

تحياتى لكم جميعا واسمحولى انزل اجمل الاغاني تدعيما للموضوع ويكون فيه جزء من الفن الاصيل

ارق التحيّه

ياخلى القلب لحليم

[ندعوك للتسجيل في المنتدى أو التعريف بنفسك لمعاينة هذا الرابط]

حكاية العمر كله فريد الاطرش

[ندعوك للتسجيل في المنتدى أو التعريف بنفسك لمعاينة هذا الرابط]

زى الهوا لحليم

[ندعوك للتسجيل في المنتدى أو التعريف بنفسك لمعاينة هذا الرابط]

انت الحب لسومه

[ندعوك للتسجيل في المنتدى أو التعريف بنفسك لمعاينة هذا الرابط]

حكم علينا الهوا لسومه

[ندعوك للتسجيل في المنتدى أو التعريف بنفسك لمعاينة هذا الرابط]

قولوا لعين الشمس ماتحماشِ لشادية

[ندعوك للتسجيل في المنتدى أو التعريف بنفسك لمعاينة هذا الرابط]

سألوني الناس لـفيرز

[ندعوك للتسجيل في المنتدى أو التعريف بنفسك لمعاينة هذا الرابط]

روعة صافى

موضوع حقيقى رائع وفكر اروع

ومهما تكلمنا عن زمن الماضى الجميل ـ فلن تسعنا الصفحات ، ولن تسعفنا الكلمات .

ولكنه بلا ادنى شك يسعدنا على الاقل مجرد التذكير !!!

عسى ان نسرح بخواطرنا ولو لحظات بعيدا عن الصخب والضجيج الذى نعيش فيه ويملأ الاركان حولنا

شكرا لكى صافى

وخالص تحياتى

جمال شحاتة

طول عمرك ياصافى بتمتعينا بمواضيعك الحلوة

اللى بترجعنا لأياااام زمان

اينعم الواحد لم يعش فيها

بس سمعت عنها بما يكفى

وزى مانتى قلتى لو قارننا زمان بدلوقتى هنلاقى فرق

بس لرده كل زمن وليه حاجته واغانيه وفنه

عالعموم .. تسلم ايدك عالموضوع الحلو ده

جمال شحاتة كتب:: روعة صافى

موضوع حقيقى رائع وفكر اروع

ومهما تكلمنا عن زمن الماضى الجميل ـ فلن تسعنا الصفحات ، ولن تسعفنا الكلمات .

ولكنه بلا ادنى شك يسعدنا على الاقل مجرد التذكير !!!

عسى ان نسرح بخواطرنا ولو لحظات بعيدا عن الصخب والضجيج الذى نعيش فيه ويملأ الاركان حولنا

شكرا لكى صافى

وخالص تحياتى

جمال شحاتة

جمال شحاتة اشكر لكَ كلماتك ولم اجد اجمل من ان نبحر فى بعض (روقان ) زمان

لكَ جزيل الشكر

z0d!ak كتب:: طول عمرك ياصافى بتمتعينا بمواضيعك الحلوة

اللى بترجعنا لأياااام زمان

اينعم الواحد لم يعش فيها

بس سمعت عنها بما يكفى

وزى مانتى قلتى لو قارننا زمان بدلوقتى هنلاقى فرق

بس لرده كل زمن وليه حاجته واغانيه وفنه

عالعموم .. تسلم ايدك عالموضوع الحلو ده

طول عمري!!

ماشي يازوداك مسيري أعرفك.. بس اهلا وسهلا بيك.. ومبسوطه كتير ان الموضوع عجبك.. شكرا لوجوك

كل فترة وليها رونقها.. بس مفيش مانع ان موضوعك حلو..

جزاكي الله خيرا

أم عبدالرحمن كتب:: كل فترة وليها رونقها.. بس مفيش مانع ان موضوعك حلو..

جزاكي الله خيرا

طبعا كل وقت وله رونقه ام عبدالرحمن.. وكل زمن وله معناه الجميل.. بس مفيش أجمل من تراثنا القديم..

يسعدني ان الموضوع عجبك.. شكرا جزيلا لكِ

» والله برافو